Home Page Inizio della pubblicazione
Suntu... fatti nesci
Capitolo precedente: Capitolo 14 Capitolo successivo:
PIPPI DE DUMINICIS PAISE NGRATU Ete veru

PAISE NGRATU

(quista puesia la cumposi ieu stessu
versu brile-masçiu de l'annu 1952)
Mmaruti e scunfurtati versu sira
se nd'iànu passeggiandu tra lle nule
lu Duca nèsciu e Capitanu Bracca,
tra iδδi raggiunandu e criticandu
lu core te li Caδδinari ngrati.
- «Tutta la vita spisi pe ll'unore
te la nazione e puru te Caδδinu;
pruvài te lu Burbone le priggioni
e la catina allu pete purtài».
- «Ièu quantu a Signurìa nu àggiu suffertu,
ma nnu picca te gròlia la lassài
allu paise nèsciu tantu ngratu;
lassài nnu libru ntieru te puesèi,
te lu cervieδδu miu fruttu e fatìa.
Li furestieri lèggenu li iersi
ma li paisani se nd'ànu scerrati».
- «Eppuru me cretìa ca l'Italiani
amanti suntu te li monumenti».
- «È veru quistu, e tutti li paisi
unòranu l'illustri citatini;
Caδδinu sulu a nnui nu penza mai».
- «Però, Peppinu, e su' tantu cuntentu,
àggiu saputu ca lu Farmacista
te crita à fattu a nnui doi beδδi busti
e bole cu lli fonde cu llu brunzu».
- «Ma cu lli ntisa a nnu postu unuratu
nci ole te lu Cunsìgliu Cumunale
nnu iutu certamente te quattrini».
- «Però la Giunta te nna rìcchia e' surda,
te la secunda nu nci sente pròpriu!
Nci criti tie ca l'Amministrazione
face lu stanziamientu necessàriu?».
- «Cce mme ddummandi, Duca? moi me uffendu!
Se ite te la facce ca su' fessa?».



Home Page Inizio della pubblicazione
Suntu... fatti nesci
Capitolo precedente: Capitolo 14 Capitolo successivo:
PIPPI DE DUMINICIS PAISE NGRATU Ete veru