Le purpette

Tumìneca, versu l'una e menža, mèsciu Pippi te la Ínesse se ccose a ccasa rifardatu e straccu.

Dopu puru ci era festa cumandata, aìa fatiatu tutta la mmane, perìcciu, chiusu ntra lla putèa soa de falegname, sulu, senza nnu tescìpulu, e ìa data nn'ùrtima manu de puletura.

- Puru osçe la missa te don Ginu à ddurata doi ure? - ddummandàu purfetiusa mugghièresa la Ínesse.

- Cce dici, gnora mia! Fena a moi àggiu fatiatu, puru cu spìcciu la casciteδδa ci donna Cungettina Bèrgamu me urdinàu inti giurni rretu.

- Mena, a' ba' llàate le manu e mìntite a ntàula, ca lu mangiare, tengraziamu Diu, ete prontu e li strei ae nn'ura ci sta' fàcenu ali.

- Lassati la furcina e spettamu lu tata - disse lu Giulianu alle soru e alli frati.

- Signore, danni a nui e a stu cibbu ci mangiamu la toa santa benetežione.

- Àmmene e bonappetitu!

Mesciu Pippi, mugghièresa la Ínesse e li sei fili a nnu lampu se llapâra li maccarruni fatti ccasa, e cu la muδδica de pane iancu se stusçiara puru lu sucu russu de ntru llu piattu.

Poi la mugghiere se žau de tàula, sçìu intra a lla cucina e turnàu cu lla taieδδa te le purpette a rracù e fice lu giru te la banca.

- Ttre purpette a tie lu rande, ttrete a tie Ntunietta, ttrete a lla Irene e ttrete a llu Michelinu , ttre purpette all'Emìgliu miu e ttrete àutre a stu piccinnieδδu; poi ttre purpette a mmie, la mamma òscia, e àutre ttrete…

Na, còccia! S'ànu spicciate, mannàggia, ba! Nu nci ndete cchiùi pe llu tata…

- Nu nci nd'ete? Tie nu sinti mancu fessa ca ièu rrumagnu senza purpette. Forsa, beδδi, intra stu piattu mentìtinci nna purpetta petunu, mena me'!… Ben ci sta' e a postu; sçiamu nnanti, e mele e manna cu nni sìanu… E ccinca nu mbole, cu sçatta!

Li figghi cu nnu nnùtecu a ncanna uardàanu le doi purpette rimaste ntra llu piattu loru e le sei purpette sçiute ntra llu piattu de lu sire.

- E moi a mie ste picca? - se mise a rrungulare lu Marricu, lu cchiù' piccinnu.

- Doi comu a tutti l'àutri, no? - lu retàu lu tata sou, e poi, cu fazza le cose giuste, cu lla furcina nde zzeccàu puru nna purpetta de ntra llu piattu te mugghièresa.

- Sempre furbu fuesti, caru mèsciu Pippi te sta saccòccia mia! - se menàu la Ínesse comu mùscia resta - Cussìne, moi, te piace, no? a nui do' sule purpette petunu, e a tie… sette?!

Mèsciu Pippi, senza mancu cu rrespunda, basciàu la capu ntra llu piattu smartatu e cu lla ucca scangateδδa se cumpanisçiàu a una a una tutte δδe purpette sapurite.

*         *         *