| Home Page | Inizio della pubblicazione | |
| Cose te pacci - Cunti culacchi canti | ||
| Capitolo precedente: | Capitolo 25 | Capitolo successivo: |
| La fisça te recotta | Poi fìcera pace | Lu iàggiu te matremòniu |
Mancu lu Tore Babbu tenìa tante fantasèi a ncapu; sapìa ca ci nu sse mpaciàa cu lla Ngicca, ci lu pretendìa? ci lu ulìa e ci se lu pigghiàa, spiantatu comu era, žallu de moti, ppòppetu de paìse?
Però sentimu moi puru l'àura campana.
La Lena e la Ngicca, lassamu stare la Ràzzia ca s'ìa spusata e ìa lassata la casa te sirsa, la Lena e la Ngicca, beδδe mei, muti carbi mancu li tenìanu; èranu superbiuse senza cu nc'essa nnu quàtenu, e, quandu essìanu cu bàsçianu a mmissa, l'ìi bìtere comu camenàanu mpettute e queδδitise. Nun ìanu mutu tuertu le ecine te casa ci le putìanu ìtere picchi, anzi nu lle putìanu suffrire pròpiu, e le scanzàanu e le rrignàanu te retu. Beδδe mei, puru quiste! San Foca cu lle… ngula!
La sòleta nzummeδδusa maligna e nvitiusa, nu cchiù' ttardu de l'àura espera ci lu Tore Babbu passàa e spassàa te δδannanti, lu teràu pe pizzu de giacchetta intra a llu sampuertu e, facènduni lu ciu ciu ntra nna rìcchia, lu vvertìu:
Ma lu Tore Babbu aìa nfessalutu a ddaveru a ddaveru pe lla Ngicca; se scerràu puru li ngiuri ci tantu tiempu rretu la Ràzzia te la Pulònia n'ìa mandati; se fice lu paru e sparu, cunfruntàu lu quantu e comu, an fine, nna tumìneca ssira, facènduse ccumpagnare te unu cu lla chitarra, purtàu alla mure soa nna serenata:
Lu Tore mpezzàu rìcchia, ma nu ntise resposta; ni parse, però, ca lu scuru te la fenèscia s'aìa scarassatu picca picca.
La sçiuetìa enente, te lu panieri de Santa Rini, lu Tore Babbu ccattàu nna beδδa stozza te cupeta pe lla Ngicca a mparticulare, e cquantu a nnu do' quinti te nuceδδe toste e muδδise e mienžu ròtulu te scapece, e cu sta strina se presentàu a ccasa a lle do' soru, le fìgghie ncora zite te la Pulònia benettànima. Spicciàu comu aìa spicciare: e none e sine, e cussì e culì, 'nun ìa ulutu cu dicu quistu', e 'nu tt'ìi butu spastitiare', alla fine lu Tore e la Ngicca fìcera pace, se ssettàra a ntàula, fìcera nna llecracera e, mangiandu e beendu, sçettàra lu passatu a rretu alle spaδδe e se scerràra de tuttu.
Nu ppassàra muti misi e lu Tore Babbu e la Ngicca Cutrubbiera se spusàra a ngràzie de Diu.
Ci uèi cu ssacci ci campàra felici e cuntienti, aggi pacènzia e sècutame, ca te lu cuntu.
| Home Page | Inizio della pubblicazione | |
| Cose te pacci - Cunti culacchi canti | ||
| Capitolo precedente: | Capitolo 25 | Capitolo successivo: |
| La fisça te recotta | Poi fìcera pace | Lu iàggiu te matremòniu |