| Home Page | Inizio della pubblicazione | |
| Cose te pacci - Cunti culacchi canti | ||
| Capitolo precedente: | Capitolo 37 | Capitolo successivo: |
| La cepuδδa te la patruna | Lu bardottu te mèsciu Geggè | Ritornu a Nàpuli |
Nnu marìsçiu mèsciu Geggè Pizzinacu sta' turnàa te Lecce e sta' sçìa a Muntruni, a ncaδδu a llu bardottu, ssettatu bellu còmmutu su llu mbastu, filu a scancapìtete, ma cu lli pieti tutti doi mpuggiati a nna ncina, tantu ci parìa ccumutatu a puttrona. Pe stu fattu a mmèsciu Geggè tutti ni retìanu a nfacce, percé nu ss'ìa istu mai nisciunu mìntere l'arda a nnu bardottu, nn'animale, veramente, ca nu sapìi ci era nnu bellu ciùcciu o nnu bruttu mulu.
«E lu bardottu nu bete nnu bastardu ca ssemìgghia allu ciùcciu, e nu tene quattru anche comu lu ciùcciu?» - respundìa lu Geggè,e camenaa pe lli fatti soi, senza ddèsçìa supèrchia retta.
A metà strata lu bardottu, ci pe tuttu lu giurnu ìa rrimastu a desçiunu, ca patrùnusa s'ìa puru scerratu cu porta lu sacchettu te la biàa, se fermàu ncoste allu paritieδδu te la strata, ppuntiδδàu li pieti, llungàu lu cueδδu e li musi all'erva e nu mbose cchiùi cu sse mmoa, né cu lle bone e né cu lle triste. Mèsciu Geggè nc'ìa fatta nna squagghiata te suturi, lu teràa pe capu, lu spengìa pe nnàteche, ma lu bardottu... nienti, sangu llu pìgghia!
«Camina, mannàggia ci t'à stramuertu!... Aa,...aaa..., cu te egna nna còccia!» - retàa lu patrunu, puru iδδu mbestialutu, tantu ca nc'ìa mbrafatu.
L'animale nu llu sentìa, nu nni dìa retta e nu sse mmuìa, puntusu e tuestu cchiùi te nnu veru mulu.
A δδu frattiempu, de la tirezione opposta rriàu a trottu te cavallu lu patrunu Tore Babbu.
«Caru Pizzinacu, cce tt'à ssuccessu?».
«Stu bastardu fetente te ciùcciu nu mbole ccamina; n'àggiu spezzata la bacchetta de lu scurisçiatu subbra a llu curpune, ma stu tiscraziatu... nienti! Mmaletettu a tie, osçe te cciu, quantu e' veru δδu sule!» - e ntorna mazzate.
«Uèi cu ccamina?» - ddummandàu lu Tore Babbu.
«E ccene e ccomu pozzu fare? Dimme tie ci lu sai».
«Tieni stu tialìcchiu, spèzzalu e mìntinde nna stozza a... llu teretu de la èstia, comu supposta; mpena ncigna cu nni usça... Poi me dìci. Moi au te pressa. Statte buenu!».
Mèsciu Geggè fice ccenca n'ìa tittu lu patrunu Tore.
All'antresattu lu bardottu lassàu de mangiare, ntesàu la cuta, sperràu do' chioppe te càuci, se mise a rragghiare lamentusu, partìu piretandu e fusçendu comu nnu fùrmene.
Allu buscrài mèsciu Geggè e lu patrunu Tore se truàra pe scasulità a Lecce, a nnanti a lla chiazza cuperta…
«Be, Pizzinacu, nustiersu comu tiàmmena spicciàu cu δδu pascali te ciùcciu tou?».
«Mìnchia!, caru patrunu Tore; benumale ca m'ìa rrumastu mienžu tiaulìcchiu pe… mie, senone ci cagnateδδa l'ìa rriatu δδu lampu te ciùcciu?».
Nu passàra muti giurni, però, ca la pôra èstia murìu; peccatu! pròpriu quandu lu patrunu sou l'aìa mparatu e bbituatu cu nnu mmàngia biàa, cu nnu ssàggia canìgghia e cu nnu ssapura sparinatu, pròpiu tandu lu ciùcciu crepàu. Mèsciu Geggè Pizzinacu, ca era nnu nunnu cchiuttostu curiosu e schersèbbule, se mise allora comu a rreputare:
| Home Page | Inizio della pubblicazione | |
| Cose te pacci - Cunti culacchi canti | ||
| Capitolo precedente: | Capitolo 37 | Capitolo successivo: |
| La cepuδδa te la patruna | Lu bardottu te mèsciu Geggè | Ritornu a Nàpuli |