49 - Deoti e rennecati

Fatti strambi, cose tiffìcili a cunsiterare, tantu suntu strammate; e puru su' successe e succètenu puru moi sutta a ll'uècchi nesci. Pensa nnu picca: lu latru ca prea Santu Martinu cu nni fazza riuscìre buenu lu corpu de latrunìggiu e cu nnu llu fazza sçi' spicciare a mpreggiùne, comu sia ci lu Santu ni ete sòciu e ni po' face te palu; lu stutente sciacqualattuche, chechechè e pierditiempu ca se face la cumenione e face votu a Santu Giuànne Boscu puru cu nni fàcenu dummande fàcili e cu passa all'esame, cu bessa prumossu, iδδu ci nun à mmai zzeccatu lu libbru, ca ni pisa. Nzomma cose cu tte faci la cruce alla mmersa.

Addirittura nc'ete ci prea lu Patreternu cu nni dèsçia lu curàggiu cu ccite macari nn'amicu o fràisa o sirsa pe ntariessi mmalurati, comu ci Diu pote èssere cumpare de nnu mucidiante. Rria l'omu a tanta scuncrusàggine e a tanta spruntatezza ca cerca alli Santi la cràzia cu pozza aire la mugghière de nn'àutru (la mugghière te l'àutri ete sempre cchiù' bona!), comu sia ca li Santi fàcenu li tramenžani e iùtanu li puerci e llàžžari cu ccummèttanu cose fiacche. Nzomma, nna vera anarchìa perniciosa!

Lu bruttu ete ca li cristiani, manu manu ci ànu nnanti su lla strata de lu prucressu, ddèntanu sempre cchiùi superbiusi, rètechi e rennecati, tantu ca pèrdenu la fete te lu Signore e la deužione e lu rispettu te li Santi.

Sècutame a llu raggiunamentu; ògghiu cu tte spiecu - nu ssàcciu ci nci riescu - lu motu e la manera de comu se cumpurtàanu a llu passatu li cristiani de nna parte e li Santi de l'àutra, e comu se cumpòrtanu allu presente; comu la penzàanu prima e comu la pènzanu moi. A stu prupòsetu ièu te putìa cuntare centu stòrie vere, casi successi a biru, ca su' rrumasti scritti puru subbra alle làpite te màrmulu de le chiazze e de le chèsie de Lecce. Basta cu tte mòsciu nna scritta sula. Sçiamu alla Basìleca te Santa Cruce; trasendu, a manu ritta lu iti δδu artare, δδai, su stu latu, quasi a mmienžu. Ete l'artare de Santu Ronzu. Cucchiàmuni. Cce nc'ete scrittu a punta te pennieδδu subbra a llu dipintu? Dai, lieggi tie stessu e àusa la uce, cu sentu puru ièu.

Pe dire, no?: de tandu, a ogne derlampu e a ogne trònata, lu Leccese decìa: "Santu Ronzu miu beδδu!", "Santu Ronzu, iùtame tie!" ("tie" comu a nnu amicu) e lu trenu nu ni scuppiàa a ncapu, ma se sçìa scarrecàa largu a δδa mmera. E nu sulu. Ma, ogne fiata ci li Salentini se giràanu a llu prutettore loru e preàanu:

Iδδu li sentìa e, sempre prontu, pruetìa e li cunfurtàa:

À' istu? Tuttu a postu, tuttu buenu, tuttu nurmale: nc'era la fede e lu rispettu de nna parte, nc'era la misericòrdia e la bonasçiàna de l'àutra.

Ma poi, tiempi dopu tiempi,… nu fose sempre listessu.