Sub Pontio Pilato

A nn'àura nterrucazione allu preticeδδu Caliazzu Tumènicu, ca lu latinu lu ddeggerìa picchi, lu prufessore sou ni ddummandàu cce ssignìfica la frase te lu Cretu '…passus sub Pontio Pilato' (Cristo patì sotto Ponzio Pilato).

Lu giòene Caliazzu, ca lu Cretu ntantu, pe dire la verità, lu sapìa a mmente e ogne fiata lu rrecetàa, cussine a felera senza mancu cu nci penza, prontu respuse e puru a llìngua taliana:

- …passò sopra il ponte di Pilato.

- Bestia! - retàu lu vice rettore ca nzegnàa latinu - te mintu doi subbra a llu leggistru.

- A, già, sangu de Giuta!; moi me sta' rrecordu: …passò sotto il ponte…

- Due volte bestia! Ti metto zero spaccato e vai a posto - se ncazzàu ddaveru lu vice rettore.

- Ma, prufessore, - disse cu nna uce cchiuttostu arterata lu Tumènicu - ci nu ppassàu né de subbra né de sutta allu ponte, me sai dire signurìa te ddu tiàmmena passàu?