Pax tecum

Cce brutta gente aìa ddentata quiδδa te Lucugnanu! Li ellani s'ìanu mmalemparati e facìanu la crista sia susu a lli iussi barunali e sia susu a lle tècime te la Cùria; li ziti facìanu la more tànduse ppuntamentu scusi intra alli truδδi sulagni; li mercanti rrubbàanu su lla mesura; li putiari rusecàanu su llu pisu; le putèi te mieru attisçiàanu lu muscatieδδu e lu zacarese; nzomma nu nc'era cchiùi legge te lu Signore: tutti facìanu a futticumpagni…

- Arciprèite, - ddummandàu preoccupatu e ncusçetatu lu barone Capece te Lucugnanu - comu pozzu canùscere li sùdditi mei bueni e unesti e quiδδi tristi e malandrini?

- Ete fàcile - respuse papa Caliazzu - Crai ete Pasca e tutti pe abbetùtine e usanza se fàcenu la cumenione. Signurìa te minti te coste a mie e me tieni lu piattinu: a cinca dicu "Hoc est corpus Dei" quiδδu ete nnu brau e buenu cristianu; a cinca ticu "Pax tecum" quiδδu ete nnu fiaccu cristianu, tristu e maleccore.

A llu crai, a mmissa cantata, rriatu lu mumentu, l'acciprete zzeccàu lu càlice te le Ostie cunsacrate, lu barone, tenendu lu piattinu d'argentu, ni lu cucchiàa sutta all'angalieδδu te li deòti, e de unità ncignàra cu danu a unu la fiata, la santa cumenione.

- Hoc est corpus Dei - disse lu saggerdote a nna ecchiareδδa ca su sta terra stìa 'tiènime ca te tegnu'; a nnu ècchiu tremulante, ci parìa pròpiu ca ìa 'ncaδδisçiatu lu pane te sta terra', disse puru "Hoc est corpus…" e poi l'acciprete nfelezzàu nna currisçiula de "Pax tecum!… Pax tecum!…" - tutti uèmmeni tristi e dessunesti; "Pax tecum!" a llu sìndecu, "Pax tecum!" a llu fattore, "Pax tecum!" a màsculi e a fìmmene.

- Pax tecum! - disse papa Caliazzu chiaru e tundu quandu se cucchiàu la barunessa, e a llu barone ni zumpàu lu core a ncanna.

- A, brutta spergugnata! Moi ci turnamu a llu palazzu…

Poi tuccàu a llu barone a mpersona: se genucchiàu, se mise lu piattinu sutta all'angalieδδu sou, scarassàu la ucca, cacciàu la lingua e, mentre pigghiàa l'Ostia cunsacrata, ntise ca lu saggerdote tecìa cu uce chiara e tunda:

- Pax tecum!

- Comu, puru a mie?! - dummandàu cu nna uce lamentusa lu barone.

- Anzi - disse papa Caliazzu cu nnu tonu sulenne - a tie ttre fiate: "Pax tecum! Pax… et comum! Pax… te cazzum!"