Nna malùmbria

Nna sira le ecine stìanu ssettate allu friscu intra alla curte nanti casa e facìanu quasettu cu lli fierri. Li strei ìanu straccati cu sçiòcanu a campana e a scundilucerte e stìanu cuati susu a lli lemmetali te le porte.

Cutulandu la capu se cucchiàu tomba tomba lu Ràzziu de la Gesuilla, lu ortulanu, e ncignàu a cuntare ca pe ttre nnotti te siècutu, standu intra lla pagghiara a uàrdia te le statòteche, aìa ista essìre nn'ànima de lu Nfiernu.

Tutte δδe nunne se fìcera la cruce - largu nde sia! - e, siccomu alli spìreti nci cretìanu mutu, ulìanu cu ssàccianu puru li particulari, casumai casumai putìanu nduenare cine putìa èssere δδa pôra ànima meschina.

Pròpriu tandu, truànduse a passare pe scasulità te nanti a lla curte, papa Caliazzu dese uce e salutàu:

- Care patrune te casa òscia, bonasera a tutte.

- Bonasera, acciprete; serve de signurìa.

- A prupòsetu, acciprete, - disse la Tora Fuδδèa - na, lu Ràzziu sta' dice ca pe ttre notti te fila à bista passare te fore sou nna ànima tannata.

- E comu à' fattu cu lla canusci, Ràzziu? Te ddu à' capitu ci era nn'ànima tannata o nn'ànima biata? - ddummandàu papa Caliazzu.

- Nu putìa èssere nn'ànima te lu Purgatòriu o puru ssia te lu Paraìsu? - ddummandàu la Cungetta Senzaminne, quasi sputtendu.

- None, acciprete, - respuse securu lu Ràzziu te la Gesuilla - era nn'ànima te lu Nfiernu.

- E comu l'à canusciuta? Spiècate, cu tte essa l'anima toa! Tamme nna tema…

- Tenìa li pieti spaccati e purtàa le corne e puru la cuta: era l'ùmbria te nna éstia ssemigghiante a nna crapa zoppa.

- A, Ràzziu, Ràzziu, moi sta' capiscu; ài raggione: la malùmbria toa stessa era!