Lu cappieδδu intra a lla capu

Ccerti, quandu se fìssanu, pèrdenu lu suennu e scemunìscenu. Lu vescu te Lessanu, quasi ca lu Papa te Roma era te la Bassitàlia, speràa ca lu face cardinale; intra a lle metuδδe soi tenìa fissu lu cappieδδu te cardinale: te giurnu se lu mmaggenàa, te notte se lu sunnàa; intra a ll'ecchi soi tenìa cuntinuamente δδu pascali te cappieδδu cu lli brumi culure cardinale - moi ete lu casu, a! - Nzomma nci se sta' pròpriu fissàa…

Nna èspera ca lu vescu, cu nna facce scunfitata, sta' passeggiàa ntra llu villinu te lu pescupatu te unita a llu arciprèite te Lucugnanu, papa Caliazzu, ca, iatu iδδu, purtàa nna cera bella, tranquilla, scusçetata, ni tisse:

- Arciprèite, lu Papa Pàulu IV ci sape ci se rrecorda ncora te tie, de quandu tie e iδδu aistu l'occasione cu faciti lu iàggiu a ncarrozza te unita…

- No, nu ccrìsçiu… - respuse papa Caliazzu, temendu cu nnu ssia lu a' mmanda a Rroma pe nna raccumandazione - Pensu, anzi suntu sicuru, ca Sua Santetate nu sse nde pròpriu rrecorda cchiùi, se nd'à pròpriu scerratu te mie.

Lu vèscu, menandu nnu suspiru, musciandu nna facce mara, ddummandàu:

- Arciprèite, percéne, ièu ci suntu vèscuvu te nna tiòcesi cchiuttostu mpurtante, me àsçetu e me nnervusiscu e àggiu ttenìre sempre tulore te capu; e tie, sèmprice prete te nna paròcchia tantu meschina, te ìsçiu sempre tranquillu e scusçetatu, quarche fiata puru strafuttente, senza fastiti e senza rattacapi, a?

- La raggione ete, Caru Bonsignore, ca ièu tegnu la capu intra a llu cappieδδu te prete, signurìa, nvece, tieni lu cappieδδu te cardinale intra alla capu!