Nuè e li 'affarini'

Quandu rriàu lu turnu sou, lu barone Capece te Lucugnanu fice l'invitu a llu palazzu. Ci sape comu foi: forsi lu tiempu nnulatu, sçeruccusu e ùmetu, forsi lu banchettu nsìpetu, forsi la malesçiana ci ognettantu te pìgghia senza mutivu, lu fattu foi ca lu festinu se cangiàu a nnu murtòriu e li amici ncignàanu cu sse nsùstianu e cu sse ncaδδìsçianu. A nnu ccertu puntu la barunessa, cu rriànima la reunione, fice la pruposta:

- Percéne nu ccuntamu do' sturielle, do' fatti curiosi?

- Buenu, amici. Forsa, a turnu: ognetunu cu ccunta nnu culàcchiu.

E ncignàra ognetunu cu dica lu sou. Le sturielle te le nobbirdonne fòsera scemiceδδe, senza sale e senza pipe; quiδδe te li signuri màsculi fôra, allu sòletu, supèrchiu spinte, anzi lurde e mùcete, tantu ci papa Caliazzu li puru sçiutecàu:

- E no, e! nnanti a lle signure nnu picca te crianza l'imu ttenìre, a!

- Ae raggione l'acciprete - disse donna Giurdana - ui bu nd'ìu scurnare cu ccuntati sti culacchi cussì mùceti ammenu nnanti alle caruseδδe.

- Certu - disse papa Caliazzu - senone stu salottu se mputtanìsçia e ddenta nnu casinu.

- Mbe, allora cùntande una tie pulita; dine una signurìa, ca te sta' faci lu brau, paru paru tie! - ni respundìu nnu picca uffesu lu marchesinu Lubbellu.

- Buenu! Moi bu nde cuntu una, ca la sentìi a Rroma: la cuntàu nnu bonsignore a nna matre batissa.

Lu giurnu prima te lu delluviu niversale, Nuè fice salìre susu all'arca nna parìgghia, màsculu e fìmmena, te ogne rrazza te animali. Cu nu ssia, però, fradditantu fàcenu figghi e l'arca se ppesantisce e bae a fundu, lu patriarca Nuè, iutatu te li ttre figghi Semme, Camma e Iafette, spanàra li 'affarini' a tutti li animali màsculi e li mpìsera a lle fiancate te la nave.

Spicciatu lu ddellùviu, lu patriarca prima mpanàu li 'affari' a lli ttre figghi soi, poi mmasunàu li màsculi te li animali e se mise a spàrtere a ognetunu la picareδδa soa:

- Te ci ete stu niervu pezzutu? - ddummandàu Nuè.

- Miu - respuse lu tàuru.

- Te ci ete stu piricandieδδu?

- Miu - e se presentàu lu mùsciu.

- Te ci ete sta pipì piccicca piccicca?

- Mia - disse scurnusu lu riδδu.

- E stu ùngulu, benetica, a cci mpartiene? - ddummandàu Nuè, ma nisciunu se presentàu cu llu ritira - Ei, aìti nzurduti o cecati? Santu Pistone miu beδδu, sta picareδδa te ci ete? ci ete lu patrunu te stu bellu 'affare'?

- Dinni ca ete tou…, dinni ca ete tou… - ni suggerìu la mugghiere surgìcchia a llu maritu surge, spengèndulu a nnanti.