Lu canònecu papa Caliazzu more

La morte rria pe tutti, nu ssulu pe lli puerieδδi ma puru pe lli capezzuni (e quistu ete nnu cùnsulu, ammenu!), pe lli sèmprici cristiani e pe lli cristiani birbantazzi, pe llu sèmprice saggerdote e pe llu Papa te Roma; cussì puru papa Caliazzu, ca ìa statu capace cu pìgghia pe fessa paisani, baroni, vèscuvi, nu potte nfenucchiare la Morte.

Lu male suttile, surdu, lu sçìa cunsumandu a picca a picca e, quandu se nde ccurgìu, nu nc'era cchiùi nienti de fare: a picca tiempu perse l'appetitu, le forse, li desederi, e scatìu bruttu e se tese a llu liettu.

La noa, ca lu canònecu papa Caliazzu stìa fiaccu cu muera, se spase pe tutte le cuntrate. Lu vescu te Lessanu, quandu ni rriàu a rrìcchia ca l'arciprèite stìa cu spera, se fice ccumpagnare a Lucugnanu, percé ulìa iδδu stessu a mpersona cu dèsçia a papa Caliazzu, prima te la ngunìa, li lùrtima sacramenti e la stremunzione.

- Fìgghiu, tocca cu tte faci forsa, moi ci stai cu parti all'àutru mundu.

Papa Caliazzu, ca ìa persu lu pilu ma filu llu ìzziu, sçìu cu sse ratta a… δδai e cu fazza 'sanumetoccu', ma nu sse fetàu, perìcciu, e gnuttìu maru.

S'ìa fattu scuru quandu Bonsignore staccàu te capu allu liettu tantu nnu crucefissu, poi ddumàu nna candila e llumenàu lu corpu piacatu te lu Signore Gesù.

- Uarda, fìgghiu, a cce bàrbaru motu li sçiutèi rendùssera Gèsu Cristu; sai, no?, ca lu Fìgghiu te Diu ccettàu la morte cu tte sana te li peccati toi?

Papa Caliazzu cu ll'ecchi pandi fice segnu te sine.

Lu vèscuvu cu llu crucefissu alla mancina e cu lla candila alla ritta llumenàu la capu te Gesù e disse:

- Uarda, caru canònecu, le spine te la cruna comu trapànanu sta frunte ndilicata; e quistu pe lli peccati toi.

Papa Caliazzu uardàu Bonsignore e cutulàu picca picca la capu.

Lu vescu purtàu l'ampa te la candila nnanti a llu custatu te Gesù e secutàu:

- Uarda, arciprèite, sta ferita allu core te Gesù; ni la facestu ui: lu centurione cu lla lanza e tie cu lli futtisteri toi.

Lu moribbondu a stu puntu sturcìu l'ecchi e strinse li musi. Bonsignore, mmuendu la candila subbra e sutta, cucchiandu l'ampa a lle piache te lu Crucefissu, decìa:

- Pàricu te Lucugnanu, li sta' biti sti doi chièi alle mànure te lu Signore? - e nci cucchiàu la candila ddumata - Lu sta' biti st'àuru centrune - e nci ccucchiàu la candila - alli pieti te lu Signore? Tie ni l'à' nchiuati, sì, tie trapularu peccatore.

A stu puntu papa Caliazzu, ca ci sape quantu aìa nchiatu e trinchiatu, nu nde potte cchiùi e se fetàu cu parla e cu dica:

- Ccellenza, statte ttentu cu sta candila ddumata, cu nu ssia cazzu cazzu ni a' brusçi li carànfuli a llu Signore e dici ca su' statu ièu!

Mbe, amici mei, ièu aìa ulutu cu stati presienti e cu betiti e cu sentiti.

Pigghiàu e scuppiàu nna risata generale, mmensa, ci se spandìu pe tuttu lu Capu; e tandu stessu l'ànima ncora giòane te papa Caliazzu se scuδδàu te lu corpu leprisu e se nde ulàu a ncelu, llecra, presçiata, cuntenta ca lassàa stu mundu scemu e mmaluratu pròpriu quandu la gente se sburdellàa te risate.