La Semana Santa te nna fiata

. . . poi ttaccàanu le campane e ncignàa la semana santa, cìnque giurni e mienzu de penetènzia e de passione (sta' parlu te cchiùi de mienžu sièculu rretu).

Veramente tandu le pene, le sufferenze e li tispiaceri duràanu l'annu ntieru, mese dopu mese; li pentimienti e li rimorsi te l'ànima li sentìamu δδi giurni quandu etìamu li artari mmucciati cu lli paramienti viuletti, culure te marangiana; quandu purtaàmu a llu sebburcu piatti urnati te chianticeδδe ianche te ranu fattu cigghiare allu scuru te le suttascale; quandu menaàmu alli pieti te lu Signore carròfali žanguenati spugghiazzati e fiuri ianchi te tubberose e ni ddumaàmu lumini te cira; quandu sçìamu cu basaàmu lu Signore muertu, ncora chinu te sangu, be u miu, stisu susu alla bara.

Te ncupìa lu core puru quandu sentìi lu Lesandru Sculoppu o lu Pippi Recuδδu sunare le misse e le seròtine cu lla tròccula o tròzzula, comu se chiamàa iδδa, e quandu etìi passare, estute a lluttu strittu, la Ndulurata Nziδδi, sorsa la Pippi de lu Luigginu, la Tumènica Pauleδδa, la Gesuilla, la Marìa Russu (cristiane bone ddaveru, e nu bonecristiane!), ca sçìanu alla chèsia cu pprèanu lu Signore e la Matonna, filu cu mmalànganu.

La chèsia matre se enchìa china china de màsculi e de fìmmene, de randi e de piccinni, quandu se cantàa lu Pàssiu de Gesù.

Papa Diatoru, l'arciprete, sistematu susu a lli scaluni te l'artare maggiore, puru ssendu cecu rrecetàa cu nna uce china, pastusa te barìtunu, le palore te Gesucristu (ni le suggerìa lu Llau semenarista); papa Ucciu, te subbra allu pùrpetu, leggìa cantandu le frasi te la turba, te la gentàglia e de li persunaggi ca se truàanu nturnu a llu Nažarenu; fràisa lu Cìcciu cu ??a bella uce chiara, àuta, ntunata te tenore cantàa le parti te lu testu, ene a dìcere lu raccontu te comu aìanu sçiuti li fatti.

Be, carusi, ci tandu aìu ntisu cantare lu Pàssiu a botta e risposta, te tiru a ntiru, ìu rrumasti ddaveru babbati e puru lu core uèsciu s'ìa ntennerutu.

La sçiuetìa a mmatina, poi, facìanu la cena: l'acciprète facìa la parte te lu Signore, benetecìa le puδδiche cu ll'uèu e li purecasci; llaàa li pieti alli apòstuli a unu a unu, tùtici pôri ecchi besugnusi: lu Nzinu Chiangimuerti, lu Mecu Furmìcula, lu Roccu Cainu, lu Mmelu Culummu, lu Pei Petosi, lu Vicenzinu Zužžù, lu Pippi te la Giuvina, e àutri, e poi ni dunàa nna pagnotta te pane iancu petunu.

La ernetìa a ssira tardu, poi, spicciàanu li chianti e li ncusçi e ncignàanu li risi (lu Signore ncora muertu cu nni perduna!). Allu trappìtu te Fra Tumasi o intra a llu sampuertu te lu Generosu se rrecetàa la "Trasçètia de nostru Signore", la cundanna e la crucefissione de Cristu carceratu.

Mèsciu Affretu cancàscieri facìa la parte te Gesù, percé era tantu mazzu ca, nutu a ncristu, se etìanu le còstule; lu Gennarinu a fiate facìa la parte de San Giseppu e a ffiate quiδδa te Nicutemu; lu Cìcciu Pàssaru, ca tenìa nna facce ndilicata e nnu nasu prufelatu, facìa te Marìa, la Matonna Ndulurata; mèsciu Filippu Mascaržone era Caifassu, lu Micheli Sciufferre era Pònziu Pilatu e lu Ronzu Pintu facìa te Giuta Scariota.

Era nna rècita mara, nnu cuntu de dulore e de morte, ma nvece cu sse chianga, se sçìa spicciàa a rrisate.

Percéne? percé nc'era sempre nnu pruticulu cementatore ca se pigghiàa li custi e facìa tespietti a lli cumpagni: su llu cchiù' bellu te la rècita, allu saggerdote Caifassu ni facìanu catìre la mìtria te capu, o mentìanu a rrisçu Giuta, mpisu mpecatu a nna chianetta, cu sse nfoca a biru a biru, oppuru cu nna spingulìcchia, cittu cittu pungìanu sutta a lle chiante te li pieti (parlandu ccrianza) lu Signore nchiuatu alla cruce, e quistu mmenezzàa ca se nde scinde prima ncora cu spera.

Ma la cosa cchiùi divertente era lu sàbbatu a menžatìa alla Cròlia. Mpena papa Diatoru ntunàa "Cròlia in eccersi Deo!" e lu sipàriu te l'artare se aprìa comu a llu triatu, lu Vittòriu te la Cralice nde facìa ulare ttre palumbi ianchi e nui uagnuni ni scatenaàmu; e ci cu lli campanieδδi, ci cu lle trènule, ci cu lle trumbette, li strei piccinni cu lli tetè, li tescìpuli te ferrarìa cu zappe azzarisçiate e martieδδi, ncignaàmu a sunare, a bàttere, a sçhiδδare pe llu prièsçiu, a fare nnu tale frastuenu ca li prieti, lu sacrestanu e puru Papatunatu nu rriuscìanu cu nni rrefrènanu (l'Ucciu te la Pìggia, poi, l'Urlandu te la Mària, lu Rafelùcciu te la Ramundina, lu Pippi te lu Totu te lu Fetericu, li cchiù' tristi, se scatenàanu - ci l'à straìi - e ci li ntartenìa?).

Nu sulu nui strei, ma puru li nunni randi cu lli bastoni tuzzàanu susu alli scanni te la chèsia, puru le ecchiareδδe se attìanu lu piettu e cercàanu ràzzie allu Signore risortu.

Era bella tandu la festa, cchiùi sentuta e cchiùi amata te moi, percé tandu Pasca rande enìa nna fiata all'annu… moi, nvece, la gente pare ci ole ffazza sempre pasca!

Però àggiu dìcere la erdate: li cchiùi presçiati de tutti (e se etìanu a nfacce) èranu mèsciu Filippu sartore, mèsciu Nucita ferraru, lu Santuzzu, lu patrunu Ntunùcciu te lu Rre e lu Cìcciu cabbinista, ci cu ll'ecchi lùciti lùciti uardàanu subbra ll'artare Cristu Retentore, ca cu lla manu ritta benetecìa l'umanità e cu lla manu mancina tenìa žata ritta all'ària nna bandiera russa.