| Home Page | Inizio della pubblicazione | |
| Cose te pacci - Cunti culacchi canti | ||
| Capitolo precedente: | Capitolo 5 | Capitolo successivo: |
| Cussì sçìanu le cose, prima… | La cummare furmiculìcchia | Lu ràulu e lla urpe |
Sta stòria ete pròpiu pe lli cchiù' piccinni. Aìi bìtere comu stìanu attenti, beδδi mei, cu lle rìcchie tise e cu ll'ecchi pierti, mentre la mamma rande facìa cu lli fierri a mmanu lu quasettu e cuntàa, cuntàa fàule cu δδa uce cara e fina.
Nc'era nna fiata nna furmiculìcchia ca, scupandu scupandu a ccasa, truàu nnu sordu.
«Cce mme nde ccattu, cce mme nde ccattu: me nde ccattu nnu buccunottu?... None, none, seno' me chiàmanu cannaruta!».
«Cce mme nde ccattu, cce mme nde ccattu: me nde ccattu nnu cappellinu cu lla pinna te paone?… None, none, seno' me chiàmanu caggianeδδa!».
«Cce mme nde ccattu, cce mme nde ccattu: me nde ccattu nnu sçisci nuèu?… Sine, sine, cussì' me ngrillu e mme trou nnu brau zitu».
Se ccattàu nnu mienžu parmu te pannu te fiàndena, se cusìu nna esticeδδa pròpriu ngraziatìcchia, se paràu e se nfacciàu a lla fenèscia.
Passàu prima nnu bellu puδδitru, ci disse:
«Cummare furmiculìcchia, cce ssi' ngraziata; percéne stai a lla fenèscia?».
«Pe mmaretare».
«Me uèi a mmie?».
«E comu faci la notte?».
«Iii… ìii…» - nnicchiàu lu puδδitru strunculisçiandu e spattendu la cuta.
«None, none, ca me faci nzatare e mpaurare. Sorta rande e statte buenu!».
Doppu nnu picca se truàu a ppassare nnu sçencarieδδu, ci ddummandàu cu nna uce cchiuttostu mbrafata:
«Cummare furmiculìcchia, percéne stai a lla fenèscia?».
«Pe mmaretare».
«Uè' tte pigghi a mmie?».
«E comu faci la notte?».
«Mmuu… mmuu…» - sçamàu lu sçencarieδδu, cutulandu la capu e fiatandu te le tarici.
«None, none, ca me faci nzatare e mpaurare» - ni respuse la furmìcula uδδànduse le rìcchie.
Passàu poi nnu aδδu cu lli speruni alli pieti e cu lla crista russa tisa tisa, idde la zita parata tantu ngraziata e ddummandàu:
«Cummare furmiculìcchia, percéne t'à' misa a lla fenèscia?».
«Pe mmaretare».
«Me uèi a mmie?».
«E comu faci la matina a prima arba?».
«Cuccurucùu…, cuccuruchèe...» - cantàu l'aδδuzzu cu nna uce sçhiδδante.
«None, none, ca tie me faci nzatare e me sçhiδδi ntra lle rìcchie. Sorta rande listessu e statte buenu!».
Allu mbrunire, parite parite passàu nnu surge cu llu musìcchiu pezzutu e disse:
«Cummare furmiculìcchia, percéne stai a lla fenèscia?».
«Cu mme trou lu zitu e cu mme mmaritu».
«Cce nde pienzi te mie? Ni cuncertamu?».
«Ma, ...la notte comu faci?» - ddummandàu speranzusa la furmìcula.
«Cìu…, cìu..., cìu» - fice lu surge rrezzandu li musi e uardàndula cu do' uecchiceδδi mpassiunati.
«Sì, sì, me piaci, ca tie nu mme faci nzatare e mpaurare. Trasi e faurisci senza tanti cumprimienti».
La tumìneca alla mmane li ziti belli parati sçera alla chèsia e se spusàra. Fradditantu ci la furmiculìcchia se salutàa cu nna currisçiula de soru e de cumpagne, mandàu lu maritu a ccasa cu ba' spia la pignata e lla taieδδa e, percisà, cu stuta lu fuecu.
Spetta ca moi ene, spetta ca moi rria, lu surge nu sse idde e alla mugghiere ncignàra cu nni ègnanu le sçandèi a ncanna e a nfacce.
Quandu la furmìcula turnàu a ccasa, chiamàu te cquài... e nisciunu respuse, chiamàu te δδai... e mancu; an fine sçìu cu mmenèscia lu pignatu e de unita a lli turcinieδδi catìu ntru llu piattu lu pôru surge ddelessatu. Llora la furmiculìcchia spurràu a cchiàngere e se mise a rreputare:
Ogne ffiata, a stu puntu, alla nepute cchiù' piccinna, ca ìa stata ttenta cu lla ucchiceδδa scarassata, se enchìanu l'ecchi te làcreme, e lla nonna se l'ìa mbrazzare e se l'ìa strìngere a mpiettu. Cu nnu ssia puru tie, ca sta' llieggi, rrimani cu llu core mmarutu, moi de siècutu te cuntu nna fàula lliecra.
| Home Page | Inizio della pubblicazione | |
| Cose te pacci - Cunti culacchi canti | ||
| Capitolo precedente: | Capitolo 5 | Capitolo successivo: |
| Cussì sçìanu le cose, prima… | La cummare furmiculìcchia | Lu ràulu e lla urpe |