6 - Lu ràulu e lla urpe

Nc'era nna fiata nnu ràulu ci aìa rrubbata nna stozza te casu pròpriu a lla mmassara Tumasina, e se nd'ìa ulatu àutu àutu subbra a nn'àrveru te nuce. Mentre se lu cumpanisçiàa a ngrazie de Diu, rriàu nna urpe spamecata ca, ppena entàu nna ccerta ndore e se ccurgìu te lu ràulu, ni inne ula cu sse màngia lu casu… e lu aceδδu, ci ni enìa inta. A nnu zumpu nu pputìa rriare fena alla stanga tantu àuta a ddu stìa bellu cuatu lu ràulu; e dopu ci ibbe penzatu: "comu fazzu e comu nu ffazzu", decetìu cu sse ccuntenta te la sula stozza te casu.

Comu sia ci sta' pparlàa cu iδδa stessa, la urpe cu uce ndilicata, ma cu sse fazza ssèntere, pigghiàu e disse:

«Stu aceδδu nìuru comu lu eδδutu tene nna cumparìa straurdinària; ci tenìa la uce autrettantu bella, era l'aceδδu cchiù' ngraziatu te lu mundu».

Lu ràulu, ca era cusçinazzu te la curnàcchia caggianeδδa e nu picca superbiusu era puru iδδu, ntesàu tisa tisa la capu, llargàu le ale e fice: "Craaa" (veramente, ni essìu nna uce mbrafata cchiùi te quiδδa te cusçìnasa la curnàcchia).

Pôru minchia, però! ca, quandu sçìu cu ccanta e brapìu lu pizzu, la stozza te casu ni scappàu de ucca e sçìu ccatìu ritta ritta intra a lli cannaliri te la urpe, ca, furbazza e malandrina, sta' spettàa te sutta cu lla ucca spalangata.