Home Page Inizio della pubblicazione
Cose te pacci - Cunti culacchi canti
Capitolo precedente: Capitolo 32 Capitolo successivo:
Íseta a lla Matonna te lu Spràsemu Nna famìglia de scuncignati Lu lenguàggiu te l'animali


32 - Nna famìglia de scuncignati

La noa de stu fattu quasi meraculusu se spase pe ttutti li paìsi e rriàu puru alla cità te Lecce. Puru lu Foffu l'ìa ntisu cuntare, a ccasa soa, te màmmasa la Ngicca te la Pulònia, e δδa sira stessa ose cu llu cunta ntra lla scola; già, percÚ lu Foffu, randiceδδu, aìa turnatu alla scola, facìa le scole serali.

«Ti do il permesso, Rodolfo, - tisse lu maestru Pepi - a condizione che il fatto lo racconti in italiano».

E lu poru Foffu, cquài farfugghiandu, δδai cunfundènduse, moi sutandu e rrussendu, se mise cu pparla a mpulitu. Chianu chianu poi pigghiàu lena e se fetàu cu cunta chiaru e tundu li fatti te filu a filora.

Quandu, però, all'ùrtima rrecetàu: "...e lo gallo schiδδò, lo gatto lo rranfò, lo cane lo mordò e lo somaro li dese nna scatapinta", tutta la scola e puru lu maestru scuppiàra a rrìtere, tenènduse la panza pe lli risi.


Lu Tore era babbu, la Ngicca se fengìa petezzòppeca, lu Rasi era ncresciogna, lu Foffu malecarne. Cce bella famìglia! Nna famìglia senza rièsçiu, nna quatrìglia de scuncignati e strammalati. Sire, mamma e figghi campisçiàanu de spetienti, percÚ nu ttenìanu cùcuma pe nnienti, percÚ a tutti quattru la fatìa ni puzzàa e lu lavoru ni fetìa.

Nnu giurnu l'Aràsemu, già carusu te inticìnque anni, e lu Rutorfu, carusieδδu te dicinnòe, senza mancu cu sse fàcenu dare de lu sire la santa benetezione (comu era l'usanza te δδi tiempi), cussì te lu bellu bellu, senza cavallu e senza sciàbbula, se nde sçèra te casa, sparèra te lu paìse, partèra a ncerca te furtuna, ognetunu pe lla strata soa, comu sbandati.

Pe muti anni nu sse nde sippe nienti de iδδi, e la gente se li puru scerràu. Cumparèra poi, dopu tantu tiempu, cu rrècetanu, sempre gnetunu pe cuntu sou, nna trasçètia ca n'ìa ccappata... (basta pe mmoi, nde parlamu cchiù' δδammera, alla fine quasi te ste 'Cose te pacci!').

Fradditantu mmuδδàmuni la lìngua cu nna beùta te àcqua frisca cu llu iàcciu, ca tenimu de cuntare àutri fatti, curiosi e seri, fatti ci pòtenu piacìre o nu piacìre; ci lu sape?




tr>
Home Page Inizio della pubblicazione
Cose te pacci - Cunti culacchi canti
Capitolo precedente: Capitolo 32 Capitolo successivo:
Íseta a lla Matonna te lu Spràsemu Nna famìglia de scuncignati Lu lenguàggiu te l'animali