42 - Pruèrbiu nticu

Sacci, sçiuscettu, ca la scènzia e la pràtteca te li ntanati nesci se basàa su lli fatti riali, e la sperènzia de la natura e de la vita ni suggerìa li pruerbi, ca suntu veri comu veru ete l'angèliu. Nnu pruèrbiu nticu tice ca "Li turnìsi te lu Nfinfirinfì se li sçiùscia lu Nfinfirinfà". Ca stu dittèriu ete veru lu proa la spentura ci capetàu allu Tore Babbu e a mugghièresa la Ngicca Cutrubbiera, ca te ricchi ricchi ci èranu, ddentàra puerieδδi puerieδδi.

Lu fattu foi ca li tucati d'oru te l'acchiatura nu sse l'ìanu fatiati cu lli suturi de la frunte, comu n'ìa cumandatu Domeneddìu; nu s'ìanu fetati mancu cu lli mìntenu a fruttu; li tucati s'ìanu spranti e ìanu ddentati tarì, li tarì s'ìanu traspurmati a carrini, e pìgghia e sprangi e spiendi senza mai mìntere, rriàu lu tiempu ci li turnisi se spìcciàra.

Lu Tore te la Tora e la Ngicca te la Pulònia , pe lla erdate, ìanu stati sparagnusi e li sordi de l'acchiatura n'ìanu pututi puru bastare pe tutta la vita. Quantu aìanu pututu cunsumare mai iδδi, ci èranu te picca pretese? Quantu mai putìa spèndere la Ngicca Cutrubbiera ci sçìa ogne llunetìa a lli panieri e sulu quarche fiata a lla spasa te bonsignore allu pescupatu te Lecce? Ca fessarèi ccattàa! minimienži te picca turata, ci dopu nnu picca ddentàanu strasçìnule e la signura le rrecalàa alli servitori.

Ma poi aìanu turnati li do' figghi, do' beδδifatti pinti scuδδati, mmalurati, sciacqualattuche e spacendati, do' giòani senza sensu, sciampagnoni scuncignati, ci òsera cu bìsçianu a llu cchiù' mprima lu fundu te lu cippu. Lu rande, lu Rasi, nnu èrcule ressu e pesante (de cuerpu e de cervieδδu!), se etìa a nfacce ca era bbituatu cu ddica ogne giurnu: "ieni, pane, ca te màngiu!"; lu picciccu, lu Foffu, era spiertu de còccia ma sulu a llu spèndere.

E siri e figghi catèra a bàsciu furtuna. Lu Rasi e lu Foffu, comu do' sbandati, sçìanu..., enìanu..., ntorna sparìanu… e campàanu pe cuntu loru; li do' ecchi se chiangìanu la loru mara sorte.

Lu Tore e la Ngicca, besugnusi, mazzi comu caturi, dièbbuli comu ugghi ca cu nnu ttìppiti buccàanu, s'ìanu rendutti cu àbbetanu ntru nna casìpula ca te lu tettu a cannizzi, quandu chiuìa, catìanu li nziδδi, te le carasse se nfelàa lu ientu, e li pariti se li rusecàa l'ùmetu e lu salamastru; turnu turnu alla catpècchia, poi, nci nascìanu le lurdìcule, le scràsçie e li ausapièti.