Santa Lebberata

Nc'era nna fiata la marchesa te Lessanu ca stìa curcata a lliettu ma nu ddurmìa, stìa a llu mòrbetu ma lu mmatarazzu sia ci era chinu de scuerpi e de spine; ìa ttre giurni e ttre notti ci spettàa lu pàrturu te nnu mumentu all'àutru. Le tulori nc'èranu e fuerti puru, le cuntrazioni sçìanu e benìanu, ma le àcque nu sse rumpìanu e lu marchesinu nu sse ddecetìa cu bessa fore percé s'ìa presentatu filu rittu te capu, ma spiasçiatu te spaδδa.

La mammana e mancu la levatrice te Usçentu nu ssapìanu cce fare e lu marchese stìa mutu maru e preoccupatu.

Ntru lla chèsia matre nc'era lu Signore dispostu e tutte le sçiardenere e le mmassare e le serve te fore e le serve te palazzu priàanu lu Santìssemu cu fazza la ràzzia alla signura marchesa.

Te lu fattu se nde parlàa puru a lli paisi ecini. Allora papa Caliazzu, priatu te lu barone de Lucugnanu, inne a Lessanu, se presentàu allu marchese e ni disse ca ulìa cu fazza ìseta alla marchesa ncora prena te lu marchesinu.

- Arciprèite, servu te Diu - lu supprecàu la marchesa cu lle làcrime all'ecchi - signurìa saggerdote stai cchiù' ccùcchiu a llu Signore Criatore; signurìa sinti prete giòene e le prechere toi suntu ncora sincere e schette; dine nna prechera speciale pe lla lebberazione mia e pe lla mure de sta criatura, ca ole cu bessa e nu sse fita.

Certu ste palore te mamma piatusa spezzàra lu core alle cammeriere ci stìanu presienti e l'ecchi loru se enchèra te làcrime e tutti se muzzecàra lu musu cu nnu spùrranu a cchiàngere.

Puru a papa Caliazzu ni inne nnu nnùtecu alli cannaliri ma pròpiu tandu ni catìu l'ecchiu susu a nnu quatru bellu rande te Santa Lebberata, ca stia mpisu a ncapu allu liettu. Allora, cussì, comu nn'itea mandàtani de Santa Anna e Santu Giuacchinu, prutettori te le parturienti, l'acciprete te Lucugnanu se mise genucchiuni, cu lle manu cunserte, e cu ttuttu lu core a mpulitu precàu quasi cantandu:

La signura marchesa capìu a volu lu sensu te le palore, lu sensu chiaru e lu significatu scusu, e scuppiàu a rrìtere e a rrìtere e cquantu cchiùi retìa cchiùi ni ballàa la panza. Alli rebbutti te le risate stèreche te la mamma lu piccicchieδδu nzatàu, se giràu te la capu e se nde essìu rittu rittu, lìsciu lìsciu, senza mancu lu iutu te la mammana. Te tandu la numèa e la fiama te Papa Caliazzu, ca tene dènzia nnanti a Diu, ca ete puru spassusu, ca ete nnu saggerdote scicchi, se ncignàu a spàndere pe li cunturni ecini e luntani.