Le cummissioni

Quandu papa Caliazzu turnàu te Roma, sçera cu llu salùtanu tutti li amici cumpari, ca, prima cu parta, ni ìanu cummissiunati tanti uggetti pe ricordu.

L'acciprete a donna Rusetta ni purtàu nna bella statuetta te San Pietru primu papa; allu mmassaru Nanu ni dese nna tabbacchera te argentu cu llu cupèrchiu lavuratu; allu nutaru ni cunsegnàu nna bella peròccula lùcita, nnuti nnuti, cu nna capu de lupu pe manutènula.

- E a nui le cose urdinate nu ni l'à' ndutte? - ddummandàra l'àutri ca nun ìbbera nienti e nd'ìanu rrimasti pròpriu fiacchi e coremmaruti.

- Nno, cumpari, nu bu l'àggiu putute ccattare le cose osce, percé piersi li biiettini uesci e le cummissioni nu me le rrecurdàa a mente.

- E già! Le cummissioni loru, sine…, le nosce, none…

- Già, pròpiu cussine. Successe - spiecàu carmu carmu papa Caliazzu, cu nnu ssia li uffendìa - successe ca quandu sta' lleggìa li biiettini, spasi unu te coste all'àutru susu a llu taulinu, inne nna botta de ientu e nde li ulàu te la fenèscia te l'abbergu.

- E li biietti de iδδi… none? lu ientu nu nde li sparpagghiàu filu? - nsistèra li amici cu llu ciu a ncuerpu e cu llu fele a mmucca.

- No, cari cumpari; lu biiettu te donna Rusetta (ca prima cu partu m'ìa misu a manu nna maniata te piastre), lu biiettu te lu nutaru (ca m'ìa dati a cuntu uettu tucati) e lu biiettinu te lu mmassaru Nanu (ca m'ìa nticipati tùtici carrini te argentu) lu ientu nu nde li entulisçiàu, percé stìanu fermati sutta a llu pisu te le munete… Le cummissioni osce, nvece, ìanu rrumaste carte ulantine.