Modo videbitis… modo non videbitis

Papa Caliazzu sapìa picca te teuluggìa, sapìa picca e filu te felosufìa, però era nnu omu navicatu e spetentusu te le cose te stu mundu e pràttecu te le cose terrene te lu Signore. E le cose te Diu comu le cuncepìa iδδu peccussì le spiecàa a lli cumpaisani soi, le pecureδδe te la paròcchia.

Nna tumìneca ci a missa ìa spiecare lu Vangelu te Santu Luca, cu fazza capìre mègghiu alli Lucugnanesi lu significatu te la frase 'modo videbitis me' e de l'àutra 'modo non videbitis me' ('ora mi vedrete,… ora non mi vedrete'), l'arciprèite fice sistemare susu allu artare maggiore tantu nnu cestune acante.

A llu mumentu te la spieca, papa Caliazzu nci se sçìu mmise intra, nci se cuàu e cu nna uce baritunale a cantilena ncignàu: "modo videbitis me…" - recetàa e cacciàa la capu fore te lu cestune, e "modo non videbitis me" - e se chicàa e se scundìa intra a llu cestune. E poi ntorna: "modo videbitis me" - e se nfacciàa; "modo non videbitis me" - e se scundìa.

Però, - quandu tici la spurtuna! - foi lu tiàulu ci nci mise le curnìcchie pezzute? a nnu ccertu puntu la tòneca ccappàu a llu fierru felatu te lu cestune e l'acciprete nu sse fetàu cchiùi cu sse àusa, cu sse nfàccia e cu sse fazza ìtere te li presienti, ca se sta' ddevertìanu comu allu triatu.

Lu sacrestanu se nde ccurgìu te ccèncata sta' succetìa ntra llu cestune e de pressa se cucchiàu e, cittu cittu, disse:

- Arciprèite, signurìa canta: '…vitebitis…', ca te cquà' rretu me nfàcciu ièu…

- "Cussì buèi? e cussì facimu" - pensàu papa Caliazzu; e, pròpiu quandu lu Ronzu stìa cu sse nfàccia, pigghiàu e de intra a llu cestune essìu nna uce ncazzata ca disse:

- Frati e soru mei, stàtiu ttenti ca moi videbitis nna capu te cazzu!