Lu Senzaquiδδa

Talvolta, per qualche motivo particolare, capitava che il soprannome venisse mutato; ma doveva esserci una circostanza assai speciale per determinarne la sostituzione; come, per esempio, quella che capitò a Vincenzo Murrone, detto il Sagnatore perchè veniva invitato per eseguire salassi ai compaesani sofferenti gravi di ipertensione.

Dunque, pe tutta la sçiurnata lu tiempu s'ìa mantenutu bruttu, scurusu e trubbu, e le nule mmenezzàanu àcqua. Sulu la èspera tardu li celi - Santu Ronzu miu beδδu - se aprèra e se mise a chiòere, a chiòere a capasuni, tantu ca la ora nu bastàu cu gnutta tutta quanta l'àcqua, e a ntèrmene de nnu quartu d'ura la chiazza de Caδδinu se enchìu fena a llu secundu scalune te lu puzzu te San Dumìnecu e trasìu puru ntra lla putea te la Nnita te lu Cìciu, ca endìa cafè, giucculata, rusòliu e anisetta e ntra lla putèa te lu Fetericu ca endìa pasta, casu, recotta sçante, pipe e àure ndose e ndori.

Lu Icenzinu Sagnatore - e dire ca se passàa pe nn'omu saputu e drittu! - stia a llu sicuru, reparatu ntru lla putèa te la Stella Sciδδa; ma se ncignàu a feccare ntra lle metuδδe ca l'àcqua te lu celu putìa trasire a ccasa soa, e pe quistu decise cu sse nd'àsçia tandu stessu, e nu nci fôra santi cu nde lu spònianu. Appena scampàu nnu picca, se nfurdecàu li càusi e ccianfi ccianfi essìu δδaffore.

Ma nnanti alla curte te lu Pascalinu Puliti rriàu nn'àutra scarrecata cu tutti li contrapisi e lu pôru Icenzinu se fice suppu suppu a purecinu e l'àcqua ni trapanàu fena alli carni.

Mugghièresa, la Peppa te lu Aràsemu, quandu lu sçìu bidde cussì mmuδδatu te la còppula a li scarpuni, se giràu comu nna espa:

«Rebbambitu ci nu sinti àutru! percéne nu si' rrimastu a llu rreparu a dduncata stìi?»

Tandu, cari amici, lu ellanu nu ttenìa filu quattru cangiate: una pe llu iernu e una pe llu state, una pe lla uttisçiana e nn'àutra pe lla festa: panina una era! pe tutti li santi giurni te l'annu.

Pe stu mutìvu la nunna Peppa te lu Aràsemu, ca cumandàa a bacchetta lu maritu, cuntinuàu:

«Fuecu tou! cu δδa brunchite ci tieni a mpiettu, cu δδa tosse ca te sona te scasciatu… E moi cce tte minti subbra, cu cce tte cangi?»

«Nu rretare, gnora mia, nu te mbelenare… Fazza Diu!»

«None, Icenzinu te la Matonna, tie t'à' dare te fare. Mena, spìlate stu giaccu, llèate la camisa e la màglia - Gesummarìa, comu sta' scùlanu!»

«Nu rretare, Peppa, ca le ecine te sèntenu».

«Nu mme nde preme nienti te le ecine. Mena, scàlate li càusi e llèate puru li caržunetti»

«Bàscia la uce, ci te càsçia còccia, Peppa; càrmate ca a tuttu nc'ete rremètiu! Damme nna esta toa cu mme mmùcciu fencattantu le rrobbe nu sse ssùcanu alle ampe te lu fuecu»

E cussine fice: se nfelàu nna cumbinažione te bergalla e se sçiu ssettàu sutta alla cappa te lu focalire, llargàu l'anche allu beδδu quatore e se freculàu le manu all'ampa russa de lu fuecu.

Però quandu se orde la matassa te lu tiàulu - Gesu, spùndalu - lu rremètiu neu inne pèsçiu te lu dannu ècchiu.

All'àutra parte te lu focalire, mpuδδecasciata su lla cìnnere, nc'era la mùscia; a nnu ccertu mumentu la mùscia prima aprìu tutti doi l'uecchi, poi žau la capu, poi chianu chianu se ntesàu su lle quattru ranfe… E cce foi, nna saietta?… Cu nnu llanzu se menàu a δδa mmienžu all'anche perte te lu Icenzinu Sagnatore e cu ll'ugne e cu lli tienti ni rranfàu δδe cose ca pendìanu…

«Sangu tte tèsçia! - retàu lu Icenzinu - Fuecu miu, cce descràzia ca m'à capetata!»

«Cce diàmmena à successu?» - ddummandàu la nunna Peppa, tutta preoccupata e mpaurata etendu culare cocce te sangu.

«Pôru a mmie!, Peppa mia! Peppa, la mùscia me s'à mmangiatu tuttu!»

E da allora, Vincenzo Murrone detto il Sagnatore, venne soprannominato lu Senzaquiδδa, anche dopo che con sua moglie ebbe fatto due figli: lu papa Cèsare (un ex seminarista) e lu Ucciu Capiteozza.

*         *         *