Serenate
Egnu a cantare ca nci su' mandatu
te unu ci te ole mutu bene.
Cu lle sçenucchie a nterra m'à priàtu
cu begnu cu tte cantu le soi pene.
Ci lu etissi comu se nd'à turnatu…
culure a lla soa facce nu nde tene.
Ci iδδu ba mmore, se nd'ae dannatu,
ma tie ci riesti nde chiangi le pene.
Egnu a cantare piatusu piatusu,
a fare nnu lamentu mpassiunatu;
me raccumandu a ttie, fenièsciu chiusu,
dinni a lla beδδa mia ca nci su' statu.
Ci ole ssàccia percé nu su' trasutu,
dinni ca a lla turnata passu e trasu;
ci a lla turnata passu e trou chiusu
lu segnummeste e' ca m'à bbandunatu.
variante:
quiδδu è llu segnu ca m'à bbandunatu.
Mo' ci rretu a ste porte ièu su' rriatu,
mille e cent'anni sta notte cu dura;
ièu male servitore nu su' statu,
servita t'àggiu comu a nna signura.
Te cce manere te se utàu la capu
ca pare ca te fìcera fattura?
Oimmena, ca me ìsçiu descacciatu
de nnu cagnolu muzzu senza cuta!
Mo' spèzzate, chitarra, e nu sunare;
de ddu te inne tutta st'allecrìa?
A, nu canusci tie le pene mare
ci anu strusçendu quista vita mia!
Tie tàcite, lingua, nu parlare,
ci parli, parla de malancunìa;
moi ci la beδδa me ose lassare
nde chiànganu le petre de la via!
Te dau la bonasera a prima rriata,
o nsertu de lumìa, sçemma de rosa!
Tie de li fiuri si' rasta ddacquata,
si' rasta de carròfalu e de rosa;
si' beδδa fore e si' maggiore a casa,
ogne beδδizza su de tie rreposa.
Te dau te lu tou servu nna mbasciata,
dice cu llu cumandi a cquarche cosa,
ca de cce bidde a tie, facci de fata,
nu faeδδa, nu rrite e nu rreposa.
Abbandunàu la gente de soa casa
puru cu bàggia a tie, la magna rosa!
Tesira me mandara a mmie cu cantu
intra a nna strittulìcchia e nu bedìa;
δδai nc'era nna carusa senza mamma,
ssettata a lla lucerna e sta' ccusìa;
δδai iddi poi nna stiδδa bella tantu
ca era notte e me cretìa ca e' dia.