La prima matenata ci te fazzu

te la fazzu a lla porta de la via;

àusa la capu te lu matarazzu

ca do' palore dìcere te ulìa.

Ca si' china te rose ièu la sàcciu,

fena a cquannanti la ndore nde rrìa.

Decendu "Rosa, Rosa" nu mme sàziu,

ca ièu te rose nde tegnu nnu mazzu;

le tegnu siggillate ntra stu core

ca Rosa tie te chiami e Primu Amore!

E m'ànu dittu ca te chiami Rosa,

Rosa, Rusina te ògghiu chiamare.

L'àcqua cu cci te llai ogne matina

te preu, Rusetta mia, nu lla menare;

ca ddu la mini nci nasce nna spina,

nna rosa e nnu rusieδδu pe ndurare;

poi passa lu spežiale e nde la scima,

metecina nde face pe sanare.

«Te mandu lu bondì, rosa gentile;

spècchiu te lu miu core, comu stai?

Moi dimme ci l'ài autu a despiacire

ca sta' ddurmìi e ièu te descetài».

«O amore, amore miu, l'ibbi a piacire,

stia spugghiecata e poi me mmugghiecài;

e cquandu ntisi lu cantu civile

lu core nn'àutra fiata te dunài!»