Quandu murìu mugghièrema

nu nd'ibbi tantu dulore,

mo' ci m'à muertu lu ciùcciu

chiangu cu tuttu lu core:

"Ciùcciu beδδu de stu core,

senza tie nu se po' stare;

ciùcciu beδδu de stu core.

mai te pozzu cchiùi scurdare!"

Cu lle sçaffe nna sçaffunisçiata,

cu lli cazzotti nna cazzuttata

e cu lli càuci nna caucisçiata;

cu sti cutugni nna cutugnata,

cu ste pire fazzu nna pirata,

cu sti cachi, nduìna, cce fazzu?

Cu quattru liettri se scrie lu core,

cu quattru liettri se scrie lu culu;

a mmienžu te lu piettu nc'è llu core,

a mmienžu lle nàteche nc'è llu culu;

amare nu se po' senza lu core,

cacare nu se po' senza lu culu;

quandu te criti ca te tegnu a core,

te tegnu a lle capicche de lu culu!

M'àggiu fare nna cappa de fenucchi

e de fenucchi lu cappùcciu fare;

me l'àggiu fare fena a lli sçenucchi

e de fenucchi l'àggiu futerare;

ca moi me nd'iàu ddu nàscenu li mucchi,

sempre fenucchi ògghiu semmenare

e tanti nd'àggiu ccògghiere a mannucchi

quarchedunu cu pozzu nfenucchiare!

Caru cumpare miu, ulìa tte nvitu:

nduci lu pane ca fattu nu l'àggiu,

nduci lu mieru ca lu miu e' citu,

nduci lu casu ci uèi lu cumpanàggiu,

nduci la carne ca mintu lu spitu:

tie la cucini e ièu me ssettu e mmàngiu.

Quandu nascìi ièu lu spenturatu,

de l'ura parse la spentura mia:

stese tre giurni quagghiatu lu mare,

lu sule stia de fore e nu parìa;

me purtara a lla chèsia a battisçiare,

la mammana me morse pe lla via;

se pèrsera le chiài te le campane

e puru quiδδe te la sacrestia.

Dimme, dimme de mie cce nd'àggiu fare?

Turchiceδδu rrumasi, mmara a mmia!

Nnu sire ìa dèice anni c'ìa muertu

e l'àuru giurnu fice testamientu:

a nnu fìgghiu lassàu l'ària de l'ertu,

a ll'àutru centu tùmeni de ientu;

a llu piccinnu ni parse nnu tuertu,

sçiu a llu sire e nde fice lamientu;

e lu sire (lagnandu ne sse àsçia)

ni lassàu centu mìgghie e cchiùi de strata;

e la mugghière, fencattantu ie,

patruna te uardare unu ci scrie!

«Iutu, iutu!» - retàanu li riδδi

quandu mìsera fuecu a lli scrasçiali;

sçìanu decendu nu ssu' stati iδδi,

ca nd'ìanu uta parte li zenzali.

Marìtuma se chiama 'cerniientu'

e ièu me chiamu la 'scansafatìa';

nui simu uniti de nnu sentimientu:

fatìa nu nci nde trase a casa mia.

Ci ni cerca, sparimu a nnu mumentu:

fatìa pe nui, oddiu, …largu nde sia!

Lu manimuzzu petre sçia ccugghiendu

e a mpiettu a nn'omu nutu le mentia;

lu mmutu patarnosci sçia decendu,

lu surdu sçia te retu e lu sentia;

lu mùsciu casu ècchiu sçia endendu,

lu surgìcchiu le δδànzie ni tenia;

e lu zeppu: «Scappamu tutti quanti!«

e lu scubbatu: «No, me fazzu nnanti!"

Crepàu lu ciùcciu, creppe e crepìu,

crepàu te notte e nu se cunfessàu;

ièu crìsçiu ca a llu nfiernu se nde sçiu

pe lli superchi càuci ci menàu.

Ulìa ffazzu nna lettre a ngèniu miu

cu nni la mandu a llu Mammaramàu:

cu mme dèsçia lu ciùcciu ci crepìu

o la pàgghia ci quistu se mangiàu.

Č mmègghiu tte ba' nzuri a Leeranu

ca pe dota te danu Cupertinu,

te danu centu tùmeni te ranu,

miδδi tucati e nnu tueccu te linu.

Danu la zita e sulu nnu fustiànu

ci cerchi tte ba' nzuri δδai a Caδδinu,

a Merine, a lla Càia o a Pisignanu:

mancu nna strazza ca àgghia nnu carrinu!