12 - Nna custione tiffìcile

Spicciatu te mangiare, li do' cumpagni (sta' parlu sempre te lu Tore e de lu Nenzu) se ncammenàra cu ttòrnanu gnetunu a ccasa soa. Fìcera la prima metà strata te unita; cu ddefrìscanu se ssettàra susu a llu paritieδδu all'umbra frisca te nnu calittu ci ncrinàa mmera alla strata.

Se nde stìanu citti citti: lu Tore, subbrapensieri, se nnettàa nnu angale craulatu cu nnu zippitieδδu, lu Nenzu, cu lle manu a mpàuta e cu ll'angalieδδu mpuggiatu su llu piettu, penzàa e punžàa. Lu càutu era faugnusu e sulu cu tte cuètuli nnu picca, te mentìi a ssutare. L'ura te marìsçiu nu rriàa mai a ppassare; li pàssari se rreparàanu a mmienžu a lli rami pampanusi te li àrveri; li runduni tutti nìuri, nvece, ulàanu a žichi žachi àuti a ncelu; do' taragnole se ccunzàanu lu nitu intra a nnu muntune te peseδδare, mentre le cecale sçhiδδàanu, sçhiδδàanu e poi sçattàanu.

All'antresattu, te le mure ècchie te Torre Muzza se ntise lu cuccuìu de lu castarieδδu te la morte e a gnetunu ni ncupìu lu core. "Nun ete cosa bona ci δδu mmaluratu sta' ccanta moi alla luce te lu sule" - pensàu lu Nenzu Nasitechicci. Poi cu uce cchiù' bàuta:

«Forsi ci forsi era mègghiu ci murìamu - e uardàu lu Tore cu lla cuta de l'ècchiu - Forsi allu purgatòriu se pàtenu menu pene».

«E tie criti allu paraìsu, allu purgatòriu e allu nfiernu? - ddummandàu lu Tore, ci tirimpettu a unu te Lezzanieδδu se facìa lu saputu - Nu tt'à' persuasu filu ca, quandu nn'omu more, l'ànima soa ba' nnasce intru a nn'animale e, quandu more puru l'annimale, l'ànima soa ba' spìccia intru a nna rapa te àrveru?».

«Comu cagnu àe sta custione? - fice lu Nenzu Nasitechicci rrezzandu la frunte - Nd'àggiu ntisu tescùtere pròpiu nnustiersu de sta cosa, nde parlàanu ntra lla spezarìa; ma nu ll'àggiu pe nnienzi capita».

«Apri bone le rìcchie, Nenzu, e sciùδδeca lu cervieδδu, ca te la spiecu ièu la custione cu nnu sèmpiu. Sièntime sanu: tie, Nenzu, mueri, no?, te prècanu e ddienti terra; de δδa terra rumatisçiata nasce nna motta de ferràsçena; passa nna sçenca, se màngia l'erva e doppu nnu picca… ppla… lassa catìre tanta nna scafazza. Passu ièu, la uardu... e dicu: "Pôru Nenzu Nasitechicci, comu s'à rrenduttu!". À' capitu comu ae lu fattu? sine, no? nci à' rriatu? Spiècame moi tie la custione».

«Tie, Tore, mueri, te prècanu e dienti terra; de la terra nasce l'erva; passa nna acca, se màngia l'erva e dopu nnu picca… ppla… llenta tanta nna mòsçia. Passu ièu, la ìsçiu, la entu, la uardu e dicu: "Pôru Tore Babbu, ete sempre l'istessu!"».

À' capitu, li giuvinotti! Se facìanu ddummande, cercàanu cu ttròanu risposte; a fiate tecìanu puru minchialità, cce buèi,... senza scole; ma però ncignàanu cu rraggiònanu cu llu gnègneru loru, ncignàanu cu bògghianu cu ssàccianu, cu ccapìscanu, cu mpàranu…